ቅጽ 1ቀጥር 01, ታኅሣሥ 2012

    ዳግም መጥተናል!

ሩብ ክፍለ ዘመን ያስቆጠረው የሪፖርተር (አማርኛ) እና የዘ ሪፖርተር (እንግሊዝኛ) ጋዜጦች አሳታሚ የሆነው ሚዲያ ኤንድ ኮሙዩኒኬሽን ሴንተር (ኤምሲሲ) ኃላፊነቱ የተወሰነ የግል ማኅበር፣ ሪፖርተር መጽሔትን ከ1990 ዓ.ም. ጀምሮ በየወሩ ያሳትም እንደነበረ፤ ነገር ግን  በ2000 ዓ.ም. “ጋዜጣ የሚያሳትም መጽሔት ማሳተም አይችልም” በሚል በተፈጠረው አስገዳጅ ሁኔታ መጽሔቱ ከኅትመት ውጪ መሆኑ ይታወሳል፡፡ ዘንድሮ ደግሞ በመፈቀዱ እነሆ ዳግም ለኅትመት በቅቷል፡፡ እንኳን አደረሰን፡፡

“ነፃ ፕሬስ ነፃ ሐሳብ ነፃ መንፈስ” በሚለው መርሐችን በመመሥረት መረጃን (ኢንፎርሜሽን) እያገኘንና እየሰጠን ማደግ ምኞታችን ብቻ ሳይሆን ተግባራችንም ጭምር በመሆኑ፤ መረጃውንም የምትሰጡንና የምትቀበሉን ደግሞ እናንተ ውድ አንባቢያን ናችሁ፡፡ በመሆኑም መረጃ ስጡን፣  አንብቡን፣ አስተያየታችሁን አቀብሉን፤ አርሙን፡፡ “ሰው በዜና ውኃ በደመና” ነውና ብሂሉ፡፡

ከሃያ ሁለት ዓመት በፊት ሪፖርተር መጽሔትን ስንጀምር እንዳልነው፣ አሁንም እንላለን፡፡ ጻፉልን፡፡ ሐሳቦችን አንፈራም፡፡ አንጠላም፡፡ ሳንሱር የለብንም፡፡ ሳንሱር የምናደርገው ውሸትን ብቻ ነው፡፡ እውነት ሁሉ በእኛ ዘንድ እኩል ነው፡፡ የፈለገውን እውነት ፈርዶ መምረጥ የአንባቢያችን ነው፡፡ የኛ ድርሻ ማቅረብ ብቻ፡፡